Home தமிழகம் “வீட்டை விட்டு வராதீங்க!” – அலெர்ட் செய்யும் அரசு… கோடையை எப்படி சமாளிப்பது?

“வீட்டை விட்டு வராதீங்க!” – அலெர்ட் செய்யும் அரசு… கோடையை எப்படி சமாளிப்பது?

11

தமிழகத்தில் ஏப்ரல் 17 மற்றும் 18-ம் தேதிகளில் வெயிலின் தாக்கம் மிக அதிகமாக இருக்கும், அனல் காற்று வீசும், இதனால் பகல் 12 முதல் மாலை 3 மணிவரை பொதுமக்கள் யாரும் வெளியில் செல்ல வேண்டாம் என தமிழ்நாடு பேரிடர் மேளாண்மை ஏஜென்சி அவசர அறிவிப்பு ஒன்றை வெளியிட்டது. தமிழகத்தில் வெப்பம் அதிகமாக உள்ள  18 மாவட்டங்களில் உள்ள ஆட்சியர்களுக்கு இது குறித்து அவசர உத்தரவு வழங்கப்பட்டுள்ளது. பொதுமக்களுக்கு உடனடியாக அறிவிப்பு செய்யவும், மக்கள் பாதிக்காத வகையில் நடவடிக்கை எடுக்கவும் அந்த உத்தரவில் தெரிவிக்கப்பட்டுள்ளது. கோடைகாலத்தை சமாளிக்க பொதுமக்கள் முன்னெச்சரிக்கையுடன் செயல்பட வேண்டும்.

சென்னையில் உள்ள தமிழக பேரிடர் மேலாண்மை இயக்குநர் லதா ஐ.ஏ.எஸ் அவர்கள், “சென்னை, காஞ்சிபுரம், திருவள்ளூர், கடலூர், விழுப்புரம், நாகப்பட்டினம், புதுக்கோட்டை, வேலூர், திருவண்ணாமலை, கிருஷ்ணகிரி, தர்மபுரி, சேலம், நாமக்கல், ஈரோடு, கரூர், திருச்சி, அரியலூர், பெரம்பலூர் ஆகிய 18 மாவட்டங்களில் வெயிலின் தாக்கம் மிக அதிகமாக இருக்கும். ஆகவே பொதுமக்கள் யாரும் வெயில் நேரத்தில் வீட்டை விட்டு வெளியே வரவேண்டாம்” என  மக்களுக்கு அறிவுறுத்துமாறு 18 மாவட்ட ஆட்சியர்களுக்கு அவசர அறிவிப்பு ஒன்றை அனுப்பியுள்ளார்.

கடந்த 137 ஆண்டுகளில் வெப்பம் அதிகமாக உள்ள இரண்டாவது மாதமாக கடந்த மார்ச் மாதம் அறிவிக்கப்பட்டுள்ளது. உலகின் உள்ள 6300 இடங்களில் இருந்து புள்ளிவிவரங்கள் பெறப்பட்டு, அதன் அடிப்படையில் இந்தத் தகவலை அமெரிக்க வானியல் ஆய்வு மையமான நாசா வெளியிட்டுள்ளது.