மும்பை தாக்குதல்: நவாஸ்ஷெரீப் மீது தேச துரோக வழக்கு!

mumbai-attack-treason-case-against-nawas-sharif

மும்பை தாக்குதல் குறித்து பாகிஸ்தானுக்கு எதிரான கருத்துக்களை தெரிவித்த, முன்னாள் பிரதமர் நவாஸ்ஷெரீப் மீது தேசத் துரோக சட்டத்தின் கீழ் நடவடிக்கை எடுக்க உயர் நீதிமன்றம் உத்தரவிட்டுள்ளது.

2008ம் ஆண்டு மும்பையின் தாஜ் ஹோட்டல் உள்பட பல்வேறு பகுதிகளில் தீவிரவாதிகள் கண்மூடித்தனமாக தாக்குதல் நடத்தியதில் 160 பேர் கொல்லப்பட்டனர், 308 பேர் படுகாயமடைந்தனர். இந்த சம்பவத்தில் பாகிஸ்தானில் இருந்து செயல்படும் தீவிரவாத அமைப்புகளுக்கு தொடர்புள்ளதாக இந்தியா தொடர்ந்து குற்றம்சாட்டி வருகிறது. ஆனால் பாகிஸ்தான் இதை மறுத்தபடி இருந்தது.

இந்த நிலையில் மும்பை தாக்குதலில் பாகிஸ்தானுக்கு தொடர்பு உள்ளதாக முன்னாள் பிரதமர், நவாஸ் ஷெரீப் கூறியது அந்நாட்டு அரசுக்கு பெரும் நெருக்கடியை ஏற்படுத்தி உள்ளது.

இது தொடர்பாக ‘தி டான்’ பத்திரிகைக்கு அவர் அளித்த பேட்டியில், “பாகிஸ்தானில் பயங்கரவாத அமைப்புகள் செயல்பாட்டில் உள்ளன. அவர்களை அரசு சாராதவர்கள் என்று சொல்லலாம். அவர்கள் எல்லை தாண்டிச்சென்று, மும்பையில் தாக்குதல் நடத்தி மக்களில் 150 பேரை கொல்ல நாம் அனுமதித்து இருக்கலாமா?” இதை எனக்கு விளக்குங்கள். இந்த வழக்கு விசாரணையை நம்மால் முடிக்க முடியாதா?” என்று கேள்வி எழுப்பினார்.

ஷெரிப்பின் கருத்தை தொடர்ந்து, அந்நாட்டின் தேசிய பாதுகாப்பு கவுன்சிலின் உயர்மட்டக் குழு கூட்டம் பிரதமர் ஷாகித் கான் அப்பாசி தலைமையில் நேற்று அவசரமாக கூடியது.

இந்த கூட்டத்திற்கு பிறகு, தேசிய பாதுகாப்பு குழு வெளியிட்ட அறிக்கையில், மும்பை பயங்கரவாத தாக்குதல் தொடர்பான விவகாரத்தில் ஆதாரங்களும், உண்மைகளும் மறுக்கப்பட்டிருப்பது துரதிர்ஷ்டவசமானது. இது ஏற்கக்கூடியது இல்லை. இந்த விவகாரம் தொடர்பாக நவாஸ் ஷெரிப் அளித்திருக்கும் கருத்துகள் தவறானவை.

இதுபோன்ற, தவறான கருத்துகளுக்கு இந்த குழு சார்பில் கண்டனங்கள் தெரிவிக்கப்படுகிறது. மேலும், மும்பை பயங்கரவாத தாக்குதல் விவகாரத்தில் தாமதம் செய்து வருவது இந்தியாதான். பாகிஸ்தான் அல்ல என்று குறிப்பிடப்பட்டிருந்தது.

இந்த நிலையில், நவாஸ்ஷெரீப்பின் கருத்து தேசத்துக்கு துரோகம் விளைவிப்பதாக உள்ளது என்று கூறி வழக்கறிஞர் அப்தாப் விர்க், லாகூர் உயர் நீதிமன்றத்தில் நேற்று மனுதாக்கல் செய்தார். அதில், “நவாஸ்ஷெரீப்பின் கருத்து தேச பாதுகாப்புக்கும், மாநில அமைப்புகளுக்கும் எதிரானது. எனவே அவர் மீது தேசத் துரோக சட்டத்தின் கீழ் நடவடிக்கை எடுக்க உயர் நீதிமன்றம் உத்தரவிடவேண்டும்” என்று கூறப்பட்டு உள்ளது.

மும்பை தாக்குதல் குறித்து தொடர்ந்து விசாரணை நடைபெற்று நிலையில் பாகிஸ்தான் முன்னாள் பிரதமர் நவாஸ் ஷெரிப்பின் கருத்து தற்போது புதிய சர்ச்சைகளை கிளப்பியுள்ளது.

You might also like More from author