சிவகங்கையில் தமிழர் பண்பாட்டு எச்சங்கள்!!

petition-to-sivaganga-collector-asking-to-unearth-the-ancient-artefacts

சிவகங்கை மாவட்டத்தில் பழம்பெரும் பண்பாட்டு எச்சங்கள் கிடப்பதாகவும், அகழாய்வு நடத்தி தமிழர் பாரம்பரியத்தின் அடையாளங்களை வெளிக்கொண்டு வர வேண்டும் என மாவட்ட ஆட்சியர் லதாவிடம் மனு அளிக்கப்பட்டுள்ளது.

இதுகுறித்து சி.பி.எம் ஒன்றியச் செயலாளர் திருநாவுக்கரசு பிரபல நாளிதழுக்கு அளித்த பேட்டியில், ”ஆதிச்சநல்லூர் அழகன்குளம் கீழடி அகழாய்வைத் தொடர்ந்து சிவகங்கை மாவட்டம் காளையார்கோவில் தாலுகா மறவமங்களம் அருகே பகையஞ்சான் கிராமம் உள்ளது. இது மிகவும் பழம்பெருமை வாய்ந்த கிராமம்.

இங்கு பழந்தமிழர்களின் வீரம், கலாச்சாரம் மற்றும் வாழ்க்கை முறையை போற்றும் விதமாக நிலப்பரப்பின் மேல் பகுதியிலேயே கறுப்பு சிவப்பு சாம்பல் வண்ண ஓடுகள், தடிமனான ஓடுகள், தானியங்களைச் சேமிக்கும் பெரிய குதிர்கள், சங்கு, பாசிமணிகள், இரும்பு, பித்தளை, கல்கோடாரி, நாணயங்கள், உலோகத்தாலான காதணிகள், கல்மணிகள், யானை தந்தத்தால் செய்யப்பட்ட கைவளையல்கள், சங்கால் செய்யப்பட்ட ஈட்டி ஆகியவை சிதறிக் கிடக்கின்றன. மேலும் பல கைவினைப் பொருட்கள் உடைந்த நிலையில் கிடந்துள்ளன.

இவை எச்சங்களாக சிதறிய நிலையில் இருந்துள்ளன. இங்கு விளையாட வரும் குழந்தைகள் இவற்றை கையில் எடுத்து விளையாடி வருகின்றனர். இந்தப் பகுதியில் மன்னன் வேங்கைமார்பன் வாழ்ந்து ஆட்சி செய்திருக்கிறார் என்று வரலாறு கூறுகிறது. எனவே இங்கு தொல்லியல்துறை ஆய்வாளர்கள் ஆய்வு நடத்தினால் தமிழர்களின் மேலும் பல பெருமைகள் தெரிய வரும்” என்று தெரிவித்துள்ளார்.

You might also like More from author